Job 8

Bildad i tata dekdek ba God i dovot

1Ma Bildad ra te Sua i ga tata, ma i ga biti:
2Vingaia una ngo kan ra lavur tinata damana?
Ma aivia ra bung boko ra tinata na ngiem na da ra dekdek na vuvu?
3Dave, God i vakaina laka ra varkurai?
Ba ra Dekdek Muka i vabilak laka ra magit i takodo?
4Beaka a umana natum dia ga varpiam pirana,
Ma i ga nur vue diat ta ra vuai kadia kaina mangamangana,
5Una tikan milat upi God,
Ma una kail tadav ra Dekdek Muka;
6Ma ona u gomgom ma u takodo,
Na tut pi na maravut u,
Ma una tavua ta kaum takodo na kini.
7Ta ra turpaina una ikilik bar,
Ma ta ra mutuaina una uviana.

8Una tir ra tarai lualua,
Ma una nuknuk ure ra minatoto kai ra umana tama i diat;
9(Tago dat, nabung uka ta dat, ma da tuptup uka,
Kada umana bungbung ati ra pia dia da ra malur na davai);
10Dave, pa diat a tovo u, ma pa diat a ve u,
Ma pa diat a kap vaarike ra umana tinata ta ra bala i diat?
11Dave, a titiparar i tavua bulu ta ra pia ba pa i bilim?
Ba ra kaukaul ta ra pia ba pa i polo?
12Pata, tago ba i pupu ma i tur boko,
I makuk lutut, ma ra umana enana davai pata.
13Damana ra lavur nga kadiat dia nuk vue God,
Damana i panie ra ninunuk ung kai ra tena varpiam.
14Kana nurnur i takunu varbaiai,
I da ra po na kabiloko.
15I va bokon ta ra kubana, ma pa na tur,
I vatur vadekdek ia, ma pa na ki vatikai.

16I da ra vinau i tavua ta ra keake,
Ra umana ingarina dia lul vanavana ta ra uma,
17Ra umana okorina dia pulu ra anguvai vat,
Ma i ki ta ra pakana i vatvat.
18Ma ona di rubat vue kan ra pakana i ki tana,
Nam ra pakana na varpuai ure dari,
Pa iau ga gire u.
19Go muka ra gugu ta kana nga,
Ma ra umana enana diat a tavua ta ra pia.

20Ea, God pa na okole vue nina i ko kakit,
Ma pa na tur maravut ra umana tena varpiam.
21Na vabuka boko ra ngiem ma ra ninongon,
Ma ra bul na ngiem ma ra kunukula na gugu.
Diat dia milikuane u, da mal diat ma ra niruva;
Ma ra pal na mal kai ra tena varpiam na panie.
22